“शहीद प्रकाश देशमुख अमर रहे…” घोषणांनी दुमदुमला तारसा रोड, देशासाठी हसत-हसत बलिदान देणाऱ्या कन्हानच्या वीर सुपुत्र शहीद प्रकाश देशमुख यांच्या स्मृतिदिनानिमित्त तारसा रोड येथील शहीद चौक परिसर आज देशभक्तीच्या घोषणांनी दुमदुमून गेला. “शहीद प्रकाश देशमुख अमर रहे…” या घोषणांनी वातावरण भारावून गेले होते. माजी सैनिक, मान्यवर आणि शेकडो नागरिकांनी शहीद स्मारकावर पुष्पचक्र अर्पण करून आपल्या वीर पुत्राला भावपूर्ण श्रद्धांजली वाहिली.
📍 कन्हान | दि. ११ फेब्रुवारी
२४ मार्च १९७८ रोजी जन्मलेले प्रकाश देशमुख यांनी देशसेवेचे स्वप्न मनाशी बाळगत १९९६ मध्ये भारतीय सैन्यात शिपाई पदावर भरती घेतली. अल्पवयातच त्यांनी मातृभूमीच्या रक्षणाची जबाबदारी स्वीकारली. ११ फेब्रुवारी १९९९ रोजी जम्मू येथे दहशतवाद्यांशी झालेल्या चकमकीत शौर्याने लढा देत त्यांनी वीरमरण पत्करले. त्यांच्या बलिदानाला आज २७ वर्षे पूर्ण झाली असली, तरी त्यांची आठवण आजही प्रत्येकाच्या मनात अभिमान आणि कृतज्ञतेची भावना जागवते.
कार्यक्रमाची सुरुवात देशमुख यांच्या निवासस्थानी त्यांच्या प्रतिमेला पुष्प अर्पण करून करण्यात आली. यावेळी शहीदांचे भाऊ प्रदीप देशमुख आणि आई लीलाबाई देशमुख उपस्थित होते. आपल्या सुपुत्राच्या स्मृतींनी भारावलेल्या वातावरणात त्यांनी उपस्थितांचे अभिवादन स्वीकारले.
यानंतर शहीद स्मारकावर सैनिकांच्या हस्ते पुष्पचक्र अर्पण करून मानवंदना देण्यात आली. राष्ट्रगीत गायनानंतर दोन मिनिटे मौन पाळण्यात आले. संपूर्ण परिसर देशभक्तीच्या भावनेने ओतप्रोत भरून गेला होता.
कार्यक्रमाला कामठी एनसीसी ओटीएचे सुभेदार नितीन वाघ, पोलीस निरीक्षक वैजयंती मंडवधरे, नगराध्यक्ष राजेंद्र शेंदरे, माजी नगराध्यक्षा करुणाताई आष्टणकर, मुख्याधिकारी दिपक घोडके यांच्यासह अनेक मान्यवर उपस्थित होते. माजी सैनिक, सामाजिक कार्यकर्ते आणि नागरिक मोठ्या संख्येने सहभागी झाले होते.
शहीद प्रकाश देशमुख यांचे बलिदान कन्हानसाठी अभिमानाची बाब असून त्यांच्या त्यागातून देशप्रेम, कर्तव्यनिष्ठा आणि मातृभूमीवरील निस्सीम श्रद्धेचे प्रेरणादायी उदाहरण पुढील पिढ्यांसमोर उभे राहते.
“वीरांना कधी मृत्यू नसतो… ते सदैव अमर असतात.”
